నిరంతరాన్వేషి

*నిరంతరాన్వేషి*

కాలజ్ఞాని 

కాలానికంటే

ముందే ప్రయాణం చేసే

నిరంతర అన్వేషి

కాలగతిని అధ్యయనం చేస్తూ 

కాలంతో కరచాలనం చేస్తూ

సాగిపోయే మహర్షి

రేపటి కల నెరవేర్చే

కార్యాచరణను నేడే

సిద్ధం చేసుకునే సిద్ధహస్తుడు

రాబోయే అనర్ధాలకు 

మూలాన్ని 

అన్వేషించి పరిష్కారాన్ని

నిశితంగా సూచించే శాస్త్రవేత్త

జీవనగమనంలో వచ్చే 

పరిణామాలను పసిగట్టి

మనుగడకోసం ప్రణాళికను

రచించే కవిపుంగవుడు

కరిగిపోతున్న సమయాన్ని 

చూసి కలవరపడక

కల నెరవేరే మార్గాలను

కనుగొనే తాత్వికుడు

ప్రతీక్షణాన్ని సద్వినియోగం

చేసుకుంటూ సాగిపోయే

సంచార యాత్రికుడు

ఓటమి ఎదురైనా వెరువక

మరల మరల విజయం కోసం

ఎగిసిపడే కెరటంలా ప్రయత్నిస్తూనే

వుండే పట్టు వదలని విక్రమార్కుడు

క్షణాలతో పోటీపడుతూ...

అనుక్షణం పయనం సాగి

ప్రతీ క్షణాన్ని పదిలంగా 

వినియోగిస్తూ కాలం వ్యర్ధం

చేయక సద్వనియోగపరచుకొనే

సమన్వయవేత్త.

*సాలిపల్లి మంగామణి(శ్రీమణి)*