Indi blogger award

2017 లో నా బ్లాగుకి వచ్చిన ఇండీ బ్లాగర్ అవార్డ్ సర్టిఫికెట్ ఈరోజుకు చేరింది మా ఇంటికి,😁

నిజం చెప్పవా...కృష్ణా

నిజం చెప్పవా...కృష్ణా!
నే... నీదానను కానా..
నీవు లేక నిమిషమైన
నేనుండగలనా...
నిన్నటి నీమాటలన్నీ...
నీటి మీద రాతలా..
చేసుకొన్న బాసలన్నీ..
చెరిగిపోయే ఊసులా...
పెనవేసుకొన్న  మన
మనసుల కధలన్నీ
ఒట్టి కట్టుకధలేనా...
నువ్వుండేదా...గగనంలో
నేనేమో...ఇలాతలంలో
ఆశలరెక్కలతో
విహంగమై విహరిస్తున్నా..
అలుపెరుగని పయనంలో
అనుక్షణమూ...నీకోసం
అన్వేషిస్తున్నా...
ఎన్ని జన్మలెత్తాలిక
వెన్నదొంగా...
నీ పద సన్నిధి చేరగా...
చెప్పు నిజంగా...
నల్లని వాడా...నావల్లకాదిక
తనువంతా కనులై
వేచియుంది.....ఇదిగో...నీరాధిక
        (రాధమాధవీయం)
                       ...శ్రీమణి

బాపు జయంతి సందర్భంగా

ఆయన పేరు వినగానే
మన మానసతీరంలో...
మలయసమీరం వీస్తుంది
మనసంతా....సంతసంతో
మధురోహల విహరిస్తుంది...
ఆయన అవలీలగా...
ఒకగీతగీసినా,అది గిలిగింతై
చక్కిలిగింతై ఎదగిల్లి మరీపోతుంది
ఆయన గీసిన చిత్రమైనా....
ఆయన తీసిన చలనచిత్రమైనా..
మరిపించీ,మురిపించీ
మైమరపించీ,మదిమదినీ
మనోజ్ఞ మైన ఊహలలో ఊరేగించి...మననలరించి
మరపురాని జ్ఞాపకమై
మిగిలిపోతుంది
ఆయనచేతిలో....
పదహరణాల తెలుగుదనం
అలవోకగా అవతరిస్తుంది
ఆతని కుంచె తాకి అరక్షణంలో
ఆదైవం సైతం కనులముందు
సజీవచిత్తరువై సాక్షాత్కరిస్తుంది
ఆయన తలంపు రాగానే
ప్రతి తెలుగు వాకిలీ
ముత్యాలముగ్గు వేసుకొని
మురిసిపోతుంటుంది
ఆయన సృష్టించిన భామిని
మేటి సొగసుల రాణియై
ఎదవీణను సుతారంగా మీటి
కనులముందు...కదలి
కవ్వించి తీరుతుంది
ఆయన చిత్రించిన ప్రకృతి
సౌందర్యానికి ‌....ప్రకృతికాంత
కూడా దాసోహమంటుంది
వర్ణమాలకు ఒంపులద్దగలడతడు
ప్రకృతి పాదానికి పారాణినీ
దిద్దగలడు
ఒకపరి తన ఒరవడితో
హాస్య విరిజల్లును
చిలకరించి పడీపడీ నవ్వించగలడు
తదుపరి తన
రసరమ్య చిత్తరువులతో
సరసరాగాల ఊయలలూపనూగలడు
కాల్పనికతతో....
కమనీయ స్వప్నాన్ని కనులముందు నిలపగలడు
బాపు...ఆ తీయని పేరు
వినని తెలుగువారు లేరు
అతడిది
తెలుగువారి గుండెల్లో
అతడొక మధుర జ్ఞాపకం
అతడిది
తెలుగునేలపై ....వెలుగులద్దే
మనోజ్ఞమైన సంతకం

ఆ...మార్గదర్శికీ
ఆ... మనోజ్ఞ మూర్తికీ
ఆ...చిత్రకళా వాచస్పతికీ
ఆ...మధురమైన స్ఫూర్తికీ
ఆ బహుముఖ ప్రజ్ఞాశాలి....బాపూకి
ఇదే.....నా కవన నివాళి
తెలుగునేల వున్నంతవరకు
మరువదు ఇక మానవాళి
(బాపు గారి జయంతి సందర్భంగా...నివాళులర్పిస్తూ)
                సాలిపల్లిమంగామణి( శ్రీమణి)

కన్నీటి కతలివే

అతుకుల,గతుకుల
బ్రతుకుబాటలో....
బితుకు,బితుకుమని
మెతుకులు కోసం
వెతుకులాటలివి
వెతలే...గతులై
చితికిపోతున్న
చిన్నారుల,కన్నీటి కతలివి.
ఆదుకొన...లేక
అతీ...గతీ....చూడలేక
అక్కున చేర్చుకోనూలేక
చేతకాక....
చేయూత నీయలేక
హతవిధీ...అని
చతికిలపడి
చేతలుడిగి నే రాస్తున్న
చేతగాని రాతలివి
ఆ అభాగ్యులనాదుకొనగ
ఆర్తితో,అభ్యర్ధన చేయ
ఆభగవంతునికి
నాదు కన్నీటిజోతలివి😰

          శ్రీమణి

ఆంధ్రభూమి....లో...నేను రాసిన నీహారిక.....26వవభాగం

Manga mani Salipalli:
ప్రపంచ సాహితీ జగత్తులో
రికార్డు స్థాయి..
45మంది రచయితలు కలిసి
రచించిన గొలుసుకట్టు నవల
'నీహారిక' ఈనవలలో ...
నేను26వ భాగం రాసాను 
డిశంబరు2018,ఆంధ్రభూమి మాసపత్రికలో,పూర్తి నవలను
పబ్లిష్ చేయడం జరిగింది....
చదివి మీఅమూల్యమైన
అభిప్రాయం తెలుపగలరు.
వీలుంటే కొనిచదవగలరు
వెల..20/రూ...
🙏🌺🌺🌺🌺🌺🙏

ప్రకృతి కాంత

తూరుపు వేకువ వేళ
ఉదయించిన నులి వెచ్చని
అరుణారుణ కిరణం నేను
నిశిరాతిరి పున్నమిలో
శశి రాల్చిన వెన్నెలకు
వన్నెలిచ్చింది నేను
ఇంద్రధనుస్సులో సప్త వర్ణాలను
ఒలకబోసింది నేను
విరిసి విరియని మల్లియ రేకున
ఊగిస లాడిన హిమ బిందును నేను
సంకురాతిరి సంధ్య వెలుగులో
మెరిసిన రంగవల్లినీ నేనే
పురి విప్పిన మయూరికి
అరుదగు నాట్యం నేర్పిన
అచ్చర నర్తకి నేనే....
కొమ్మల దాగిన కోయిలమ్మకు
కమ్మని గాత్రాన్ని అరువిచ్చిన
గురువును నేనే
విరజాజికీ,విచ్చుకున్న చామంతికీ
పరిమళాన్ని పంచింది నేను
మెరిసిన తారకకు
తళుకుల నిచ్చిందీ నేను
ఎగిసే కెరటం నేనూ,
కురిసే మేఘం నేనే
మెదిలే కలలోనూ....
కదిలే అలలోనూ...
అణువణువులో...నేను
అవనియంతా...నేను
అన్నింటా నేనూ....
ఆద్యంతం నేనై ఆవహించియున్నా....
అందానికే అందాన్ని నేనూ
అందాల సామ్రాజ్యానికే
అసలు అధినేత్రినే నేనూ...
నాకు సాటి ఎవరూ లేరు
నాకు ధీటుగా ఎవరున్నారు
పంచభూతాలపై నాట్యమాడగలను
సింధూరపు భానుడనే
నా నుదుటన తిలకంగా దిద్దుతాను
కటిక చీకటితో నాకనులకు
కాటుక గీయగలను
వెండి  మబ్బునే నా నడుమకు
చీరగ చుట్టేస్తాను
నెలవంకనే అలవోకగా
నామెడలో ఆభరణం చేయగలను
గంగా, యమునా, క్రిష్ణా, పెన్నా
నదులేవైనా... సెలయేళ్ళైనా...
అన్నీ, నా చెలరేగిన కురులే గదా..
సప్త సంద్రాలైనా,లక్ష ద్వీపాలైనా
కొండ లైనా...కోన లైనా...
కోయిలమ్మ కూత లైనా...
అన్నీ నా అందానికి తీరుగా దిద్దిన తుదిమెరుగులు కావా....
అంటూ....మురిసిపోయింది
ప్రకృతి కాంత.....
మైమరచిపోయింది....
పరవశించి ప్రకృతియంతా....
                       శ్రీమణి

గానగాంధర్వుడు... ఘంటసాల

🌸🎼🌸🎼🌸🎼🌸🎼🌸🎼🌸

అద్భుతమది
అమోఘమది
అపూర్వమది
అమృతాస్వాదనమది
అదే...అత్యద్భుతమగు
ఆ మధురగాయకుని
మృధుమధురగాత్రం
ఆ పాటలపాఠశాలలో 
చేరి పరశించని
హృదయముంటుందా...
గరళానసైతం సుధలొలికించగల
మాధుర్య గళం విని  తన్మయమవని
తనువు వుంటుందా.....
ఆతని పాటకు పల్లవి
తానై ప్రకృతి సైతం
పరవశించి  పాడుతుంది
అశేష ఆంధ్రావనికీ
అమృతంచవిచూపించడానికే
అవతరించె కాబోలు
ఆ అమరగాయకుడు
తన మధురమైనగాత్రంతో
మది,మదినీ తట్టిలేపి
తన్మయాన మధురోహల
విహరింపచేసిన
మన మధురగాయకుడు
ఎడారిలో సైతం
తనకమ్మని పాటలతో
నవవసంతం విరబూయించగల
గాన గాంధర్వుడాతడు
అవును....ఆతని
స్వరాలాపనలో....
మన మానసతీరాన్ని
మైమరపుల మలయ సమీరం
నులివెచ్చగా తాకి సమ్మోహనరాగమాలపిస్తుంది
అమావాస్యసైతం..
ఆతని కంఠం వినబడగానే
నిండుపున్నమిని
తలపించి వెన్నెల పూలు
పూయిస్తుంది
అతడే మన ఘనఘంటశాల
ఆ మహాగాయకుని కని
పరవశించెను కదా...
తెలుగునేల
మరలరాని లోకాలకు నువు
తరలిపోయి,ఎన్ని
దశాబ్దాలు దొరలినా....
మరువలేకున్నాము...
నీ మధురరాగాల జడిలో
నేటికీ మంత్రముగ్ధులమే మేము
ఆనాడు నువ్వాలపించిన
గీతాలన్నీ ఈనాటికీ
మమ్మావహించి....
మానరనరాన ప్రవహించి
మాలో నీవై నివశించి
పరవశింపచేస్తున్నాయి
మరువగలమా...మిమ్ము
మనోజ్ఞమూర్తీ....
మర్చిపోగలమా...మీ
మహోన్నత కీర్తీ....
ఓ...అమరగాయకా...
ఓ...ఘన గాన గాంధర్వుడా...
ఓ...సంగీతసామ్రాజ్య చక్రవర్తీ...
ఓ...మహనీయమూర్తీ...
మీపాదపద్మములకివే....
మా వందనాలు
వేవేల అభివందనాలు
(గాన గాంధర్వునికి చిరు కవన నివాళులర్పిస్తూ....)
🌸🎼🌸🎼🌸🎼🌸🎼🌸🎼🌸
                      ‌శ్రీమణి

*అదిగో....ఆశలతీరం*

ఆసరా...దొరికింది...
ఆశల తీరానికి దూసుకుపోవడమే ఇక,
కాలం కసితీరా కాటేయాలని చూసినా‌...
ఎడతెగని నా మనోధైర్యం ఉందిగా...
అదే నా భరోసా...
వెతలెన్నున్నా....తల రాతని ..తల పట్టుకోను
మొదలంటూ... పెట్టాగా
వెనుదిరిగే మాటేలేదు
గమ్యం చేరేదాకా....
చేరేందుకు వేరే దారులెన్నున్నా...
నాదెపుడూ.... రహదారే
కన్నుల నిండా... కన్నీరున్నా...
విజయం మాత్రం... నా కనుసన్నల్లోనే
కారుమబ్బులు కమ్ముకొస్తున్నా...
కటిక చీకటి అలుముకొస్తున్నా...
కనులముందు నా ఆశయం
కాంతిరేఖై నాకు దారి చూపిస్తుంటే
ఎంతటి కష్టమైనా....
పలాయనం చిత్తగించాల్సిందే,
మడమ త్రిప్పని నా సంకల్పానికి
సలాం అంటూ...గులామవ్వాల్సిందే..,
కన్నీరెందుకు కార్చాలి
కష్టానికీ, సుఖానికీ పైసా.. ఖర్చు లేదనా...?
బాధలన్నీ భగవంతుడు తీర్చేస్తే.....
బద్ధకంతో నేను మొద్దు నిద్దరోవాలా....
ఇది అహంకారం కాదు
అత్యుత్సాహం అసలే కాదు
చెక్కుచెదరని ఆత్మవిశ్వాసం
భారమైనా....దూరమైనా...చేరేతీరాలి..
అదిగో.... ఆవల తీరం
అల్లదిగో.... ఆశలతీరం

                    *శ్రీమణి*

సుస్వరాలకోకిలమ్మ‌‌.. మనసుశీలమ్మ

🌸🎼🌸🎼🌸🎼🌸🎼🌸🎼🌸

ఏ గానమాలకించగానే..
గగనం సైతం పులకిస్తుందో...
ఏ స్వరం వినగానే మది
మరుమల్లెల పరమవుతుందో

ఏ గాత్రం వింటూనే...
ప్రతి హృదయానికి
చైత్రం ఎదురవుతుందో..
ఏ మరందపు పాటల ఝరిలో..
రాగాలన్నీ... మానసరాగాలై
పరవశమవుతాయో...

ఎవరి గళంనుండి
అమృతం అలవోకగా
జాలువారుతుందో...
ఎవరి గొంతు వినిపించగానే...
ఆబాలగోపాలమూ
ఆనందరాగమాలపిస్తుందో...

ఆమే....
మనసుస్వరాల కోయిలమ్మ
మనసెరిగిన మన సుశీలమ్మ

అవును ఆ కంఠం మనసుమనసునూ
తట్టిలేపుతుంది..
తాను పాడిన పాటకు
తనువంతా... తన్మయమై
వెన్నెలతానమాడుతుంది
ఆమెపాడితే... మైమరచి
మన మది... మకరందం చవిచూస్తుంది
ఆమెపాడితే... ప్రకృతి పరవశమై ప్రణయ వీణలు మీటుతుంది
ఆమె పాడితే ఎద ఎదలో
మధురోహల పూదోట
విరబూస్తుంది

ఆహా..ఎంత భాగ్యము నాది
గాన కోకిలకు
చిరుకవనమర్పించ
నా కలమునకెంతటి సౌభాగ్యమో...
ఆ సంగీతసామ్రాజ్ఞిని సన్నుతించ
ఆ అపర విద్యున్మాలినికీ...
ఆ సుస్వరాల సుమ మాలినికీ...
అక్షర నీరాజనాలర్పిస్తూ...
సుస్వరాల పూలకొమ్మ
సుశీలమ్మకు
పుట్టినరోజు శుభాకాంక్షలతో
   
సాలిపల్లిమంగామణి(శ్రీమణి)
🌸🎼🌸🎼🌸🎼🌸🎼🌸🎼🌸

నాగులచవితి

మీ పాపాలు
బాపాలని
మాపాలి పడి.....
పాలెన్ని పోసినా...
అవి మట్టిపాలే...
మీ ఇంట
కోటిదీపాలు
వెలగాలంటే
కోపాలు,తాపాలు
కాదు..కాసింత
మానవత్వపు పాలు
పెంచి చూడు...
                 ఇట్లు
               *నాగన్న*

                   శ్రీమణి

కళాసరస్వతి అవార్డు తీసుకున్న శుభతరుణం

నేడు వరంగల్ ఇన్నర్ వీల్ క్లబ్ ప్రాంగణంలో
"కళానిలయం స్వచ్ఛంద సేవా సంస్థ, గోదావరి ఖని",  వారు నిర్వహించిన సాహితీరంగంలో జాతీయస్థాయి తెలంగాణా కళా సరస్వతీ, మదర్ థెరీసా అవార్డు 2018 అందుకొన్న శుభతరుణం... మీ ఆశీస్సులు కాంక్షిస్తూ...
🌿🌺🌸🌺🌸🙏🌸🌺🌸🌺🌿

దేవులపల్లి122వ జయంతి సందర్భంగా

నిన్నటి రోజున దేవులపల్లి వారి స్వగ్రామమైన తూర్పు గోదావరి జిల్లాలోచంద్రంపాలెంలో జరిగిన 122వ జయంత్యుత్సవాల చిత్రాల సమాహారం. ఈ సభలోనే నా తొలి అతిధి ప్రసంగం చేసినది. ఆ మహనీయుని ఆశీస్సులతో పాటు మీ ఆశీస్సులు కూడా మెండుగా ఉన్నందునే నాకు ఈ సదవకాశం లభించిందని నన్ను అన్నివిధాలా ప్రోత్సహించిన మీ అందరికీ ధన్యవాదాలు తెలియజేసుకుంటున్నాను. శ్రీమణి
🌺🌸🌺🌸🌺🙏🙏🌺🌸🌺🌸🌺

గోరసం వారి సత్కారం

ఈరోజు రాజమహేంద్రవరంలో
గోదావరి రచయితల సంఘం ఆధ్వర్యంలో కందుకూరి వీరేశలింగం పంతులు శత వర్ధంతి సందర్భంగా జరిగిన  జాతీయ కవిసమ్మేళనంలో 
" తెలుగు రక్షణ వేదిక " జాతీయ అధ్యక్షులు శ్రీ పొట్లూరి హరికృష్ణ గారిచే ఘన సన్మానం అందుకుంటున్న శుభతరుణం.... *శ్రీమణి*

అట్లతద్ది

అచ్చతెలుగు వారింట
అట్లతద్ది
అతివలందరికీ అది
ఆనందసిద్ధి
అందాల అరచేత
గోరింటనద్ది
ముత్యమంతా
పసుపు ముదిత
ముదమార దిద్ది
ప్రొద్దుప్రొద్దున్నే
చద్దిగౌరమ్మ చలువ కొద్దీ...
అట్లతద్ది వచ్చింది
అచ్చతెలుగు లోగిలికి
ఆనందంతెచ్చింది
అతివలందరికీ
ముద్దమందారమై
మురిసి మురిపెంగా
సురదనలందరికీ....
వరములనొసగగా‌‌.‌..
సీమంతునులందరికీ
నిత్యం సౌభాగ్యమీయగా
నట్టింట శ్రీ గౌరి
నడయాడ వచ్చింది
ఊరువాడా చేరి
ఉయ్యాలలూగింది
ఉప్పొంగి గంగమ్మ
ఉరకలెత్తంగా
నీళ్ళలో గౌరమ్మ
పాలలో గౌరమ్మ యనుచు
పడతులందరుచేరి పాటపాడంగా
బంతులు,చామంతులతో
ఇంతులు మంతనాలతో
పట్టరాని సోయగాల
పట్టుపీతాంబరాల
సంబరాలు అంబరాన్ని
తాకగా....
పల్లెంతాపల్లెంతా..
ఘల్లు గజ్జె కట్టింది
పసుపుకుంకుమలతోడ
పలకరించింది
పచ్చని అక్షతలదాల్చి
పరవశించింది
తరుణి పారాణిపాదాల
ధరణి మురిసింది
సిరిచందనముతో
చిరునవ్వుసరులతో
అర్చించె అతివలందరు
అమ్మనత్యంతభక్తితో..
కొలిచిన వారికి కొంగుబంగారమై
పిలిచిన వారికి
సౌభాగ్యం దాయినియై
అమ్మలందరికమ్మ
అరుదెంచె గౌరమ్మ
పసుపుకుంకుమలతో
పాలించగా..‌.మము
పరిపాలించగా...
*అట్లతద్ది శుభాకాంక్షలతో*
                    *శ్రీమణి*

సి.పి.బ్రౌన్ సేవా సమితి, సత్కారం

సి.పి.బ్రౌన్ సేవా సమితి, బెంగళూరు వారి ఆధ్వర్యంలో శ్రీ కృష్ణ దేవరాయ కళామందిరం, డా. టి.సుబ్బరామిరెడ్డి కళావేదిక యందు. ప్రఖ్యాత కన్నడ సాహితీ వేత్త గౌ.పద్మశ్రీ డా.దొడ్డరంగే గౌడ గారు మరియు తెలుగు విజ్ఞాన సమితి అధ్యక్షులు గౌ. డా. ఎ.రాధాకృష్ణ రాజు గారు మరియు సి.పి.బ్రౌన్ సేవా సమితి అధ్యక్షులు ఇడమకంటి లక్ష్మీ రెడ్డి గారు మరియు ఇతర ప్రముఖుల చేతులమీదుగా గేయ విభాగంలో
"గుర్రం జాషువా గారి స్మారక పురస్కారం" అందుకొన్న శుభతరుణం.

సాగిపో ముందుకూ...

వద్దురా...చిన్న...వద్దురా!
మొద్దు నిద్దరోవద్దురా....
వద్దురా...కన్న...వద్దురా!
మొద్దు నిద్దరోవద్దురా....

ఎంత పెద్దదో‌‌...లోకం
ఎదురీత నేర్చుకో....
అడుగడుగున గతుకులే
బ్రతుకుబాట వేసుకో...
అవరోధాలెన్నున్నా...
అధిగమించి సాగిపో
ఆరాటాలెన్నున్నా....
పోరాటం నేర్చుకో...
సాగిపో ముందుకూ...
సందేహం ఎందుకూ...
వడివడిగా...అడుగులేసి
ప్రగతి పసిడిబాటకేసి......"వ"

జీవనపోరాటమిదీ....
గెలుపు సూత్రం తెలుసుకో
అసలే కలికలికాలం
ఆచితూచి మసలుకో
వంచన జోలికి పోక
మంచి నడత అలవర్చుకో
ఆవేదనలెన్నున్నా...
ఆలోచన పెంచుకో...
సాగిపో... ముందుకు
సందేహం...ఎందుకూ...
వడివడిగా అడుగులేసి
ప్రగతి పసిడి బాటకేసి...."వ"
  
  ‌                        శ్రీమణి

*మేలుకో..మేలుకై*

అయిదేళ్ళ అందలానికే...
అయ్యవార్ల తందనాలు
గద్దెనందుకోవడానికే...
వంగివంగి వందనాలు
నోటికిహద్దులేని
వాగ్ధానాలు,
చేతికెముకేలేని
బహుమానాలు,
పదవిని చేపట్టేదాకా...
కొదవేముందీ..కోతలకు,
అనుకొన్నదిసాగేవరకు
అరచేత్లో స్వర్గంచూపెడతారు
ఆకాశంలోచుక్కలనైనా..
నేలకిదించేస్తారు
తీరా...అందినాక
మనకు పట్టపగలే
చుక్కలు చూపిస్తారు
ఓట్ల భిక్షాటనలో
అడుగడుగునా...హైడ్రామాలు
ఆపై...అమాయకజనానికి
పెడతారు..పంగనామాలు
పర్యవేక్షణలు,
పాదయాత్రలంటూ..
పల్లెపల్లెకూ ...పలకరింపులు
పదేపదే..పడతారు
ప్రజలకు నీరాజనాలు
భయమేల...మీకంటూ
అందరికీ..అభయంఇస్తారు
వట్టిమాటలను కూడా
గట్టిమాటల్లాగే...
నొక్కినొక్కిచెప్తారు..
నాటకాలు,బూటకాలలో
మహానటులను తలపిస్తారు
అడుగడుగునా...
ఆత్మీయరాగమే
ఆలపిస్తారు...
అనుకొన్నది... దక్కిందో
కిక్కురుమనకుంటారు..
ఏవోదిక్కులు చూస్తుంటారు
ఇవీ..మన నాయకులనైజాలు
ఇప్పటికైనా...తెలుసుకోండి
నిజానిజాలు,
ఆసన్నమయ్యింది
అనువైన సమయం
అవినీతిరాజ్యమేలుతున్న
నేటి ప్రజాస్వామ్య వ్యవస్ధలో
నోట్ల వ్యామోహంలో
ఓట్లనమ్ముకోవద్దు
మద్యంమత్తుల్లో...
నాయకులనెన్నుకోవద్దు
మీతలకు మీరే కొరివి
పెట్టుకోవద్దు..
కోరి...కష్టాలను కొనితెచ్చుకోవద్దు
గోముఖవ్యాఘ్రాలన్నమ్మి
గొర్రెల్లా...ఓటేయద్దు
ఒక్కపూటవిందుకోసం
తాగినంతమందుకోసం
మత్తెక్కి మీఓటును
ఎటోవైపు విసిరేస్తే ..
అంతా...అయిపోయాక
అగోరించక తప్పదు
ఐదేళ్ళూ...అరకొరబ్రతుకులతో
అల్లాడకా తప్పదు
'ఓటు'అనే మహత్తరశక్తిని
అపహాస్యంచేయద్దు
అపాత్రదానం అసలేచెయ్యొద్దు
అందులకే....ఆలోచించండి
అర్హులకే పట్టంకట్టండి
ఆదమరచి..హాయిగా
బ్రతుకును కొనసాగించండి
చేయిచేయికలపండి
భరతఖ్యాతి నిలపండి
ప్రతిజ్ఞ చేయండి
ప్రజాస్వామ్యం పరువునిలబెడతామని.
                    శ్రీమణి

శ్రమైక సౌందర్య మూర్తి

ప్రకృతిపాదానికి పెట్టిన
పచ్చనిపారాణి
పదహారణాలా
అచ్చతెలుగు అలివేణి
పచ్చనిపచ్చికలో
విరబూసిన పూబోణి
మేలిమి సొగసుల రాణి
మట్టిగంధం పూసుకొన్న
మనసున్న మారాణి
మరుమల్లెల పూబోణి
మంచిముత్యాల తలదన్నే
ఆ ధరణిపుత్రిక దరహాసపు
ధగధగలకు సరితూగగలవా
ఆ నగలూనాణ్యాలూ..
ఆ శ్రమైకసౌందర్యమూర్తిని
చూసినివ్వెరపోవా...
సృష్టిలోని సోయగాలు

                          శ్రీమణి

కూతురు

కూతురు

ఆంధ్రప్రదేశ్ ప్రభుత్వం విజయనగరంజిల్లా వారు నిర్వహించిన గురజాడ-156వ జయంతిఉత్సవాలలోభాగంగాశతాధిక కవిసమ్మేళనంలో పాల్గొని సత్కారం పొందిన శుభతరుణం మీఅందరి ఆశీస్సులుఆకాంక్షిస్తూ ...శ్రీమణి

*మనగురజాడ..*

అభ్యుదయ కవితాపితామహుడు
ఆధ్రజాతిచరిత్రలో
అలుపెరుగని
అత్యద్భుత కవీశ్వరుడు
అవిరళ కృషీవలుడు
మనిషిని మనీషిగా మార్చిన
మాన్యుడతడు
కన్యాశుల్కం కావ్యరాజమునొసగిన
కవివరేణ్యుడు
ఆధునిక సాహితీ యుగకర్తయతడు
అశేష ఆంధ్రావని గుండెల్లో
అతడెన్నటికీ కరగని జ్ఞాపకం
అభ్యుదయ కవిత్వంలో
అతడిది చెరగని సంతకం
మహిపై మనకోసం
మహాభిజ్ఞుడై
ఉదయించిన మరకతమణిమాణిక్యం
మాతృభూమి ఘనకీర్తిని
దిగ్ధిగంతాలా చాటిచెప్పిన
మహోన్నతమూర్తియతడు
వ్వవహారిక భాషోద్యమకారుడు
సాంఘికదురాచారాలపై
తన కల కరవాలం
ఝుళిపించి,
కర్తవ్యం బోధించి
కార్యోన్ముఖులను చేసి
కదంతొక్కిన కలంయోధుడు
దేశమంటే మట్టికాదని
దేశమంటే మనుషులంటూ
మనిషిమనిషిలోదేశభక్తిని
మేలుకొల్పిన కవీంద్రుడు
మతమన్నది మాసిపోవునని
మనుషుల్లో జ్ఞానదీపాలు
వెలిగించిన రవీంద్రుడు
స్త్రీలపాలిట వరమై
సంధించిన శరమై
సాంఘికసంస్కరణకై
సమరంగ గావించిన
కవిశేఖరుడు
ఆ మహనీయుని కలాన
జారిన కవనాలు
అమృతాక్షరాలై
విలసిల్లెను తెలుగునాట
నేటికీ ప్రతిధ్వనించె
ప్రతీ తెలుగునోట
పల్లవించి పాటగా
ప్రగతి పసిడిబాటగా
అతడే మనగురజాడ
ఆనాటికీ, ఏనాటికీ
ఆమహనీయుని అడుగుజాడ
తేట తెలుగు వెలుగు జాడ
ఆ మహోన్నతమూర్తికీ
ఆ మానవతా మూర్తికీ
మహాచైతన్యస్ఫూర్తికీ
ఆ సాహితీ యుగకర్తకూ నవయుగవైతాళికునికీ
ఈ చిరుకవనమాలికతో
నివాళులర్పిస్తూ....
అభివందనాలు అభిజ్ఞునికి
సహస్రకోటి వందనాలు
సాహితీమూర్తికి... *శ్రీమణి*

*సర్వసమ్మతం*

నింగిలోనచంద్రమా...
నీదేమతమూ..?
ఉప్పొంగిన సంద్రమా...
నీదేకులమూ...?
ప్రతి తనువున ప్రవహించే
రుధిరమా...నీదే జాతి?
పంచభూతాలదే మతము
పాడే కోయిలదే కులము..?
విహరించే విహంగానిదే మతము...?
వికసించేకుసుమమానిదే
కులము...?
ఆనింగికీ,నేలకూ‌....
లేని ఈ కులమతాల భారం,
మనకెందుకు కులమతాల అంతరం,
మనకెందుకు మతమౌఢ్యం
మనకెందుకు
కులాలతారతమ్యం
మనకెందుకు
ఈ కక్షాకార్పణ్యం
మనకెందుకుహింసాద్వేషం
మనకెందుకుకలహావేశం
మనమంతా..మానవులం
మనదంతా..ఒకే కులం
విశ్వక్షేత్ర శ్రామికులం
విశ్వశాంతి కాముకులం
మనమతం శాంతియుతం
ఐకమత్యమే మన అభిమతం
హిందూ ముస్లిం క్రైస్తవమూ
మతమేదైనా...సర్వసమ్మతం
వసుధైక కుటుంబమే మనజాతి
మనధ్యేయం విశ్వఖ్యాతి

                  *శ్రీమణి*

వినాయకచవితి శుభాకాంక్షలుతో

తూరుపు
తెలతెలవారక
మునుపే,
వేకువ
కువకువలాడక
మునుపే....
పరుగుపరుగున వచ్చె
పార్వతీ తనయుడు
అరుదెంచె మాఇంట
విఘ్నేశ్వరుండు
ఓ మూల తెల్లారకుండా...
పదేపదే పిలిచానని
కాబోలు
పలుమార్లు తలిచానని కాబోలు
పలకరించిపోదామని
పరుగెత్తుకొచ్చాడు
ఎలుకకైన చెప్పకుండా
ఏకదంతుడేకంగా....
మా ఇంటికేతెంచాడు
ప్రమధనాధుడొచ్చాడని
పరవశమైపోయాను
సాక్షాత్కరించాడని
సంబరపడి
సాష్టాంగ దండాలు
పెట్టాను...గానీ....
మృష్టాన్న భోజ్యాలు
ఇంకా...వండనేలేదు
పాలలో ఉండ్రాళ్ళు
వేయనేలేదు
కుడుములేమో ఇంకా
ఉడకనేలేదు
పాలవల్లినింకా..
ఫలపఱచనేలేదు
అమ్మకైనా...చెప్పాడో లేదో
మరి....
ఆఘమేఘాలపై
వచ్చి కూర్చున్నాడు...
ఆకలేస్తుందంటూ..
ఆరాటపెట్టాడు
అరనిమిషమైనా....
ఆగలేనన్నాడు
ఇదిగిదిగో వస్తున్న
వక్రతుండా యనుచు
ఆమాట ఈమాటలో
పెట్టి గణపయ్యనేమార్చి
చిటికెలో వంటలను
వండివార్చాను.....
కొసరికొసరి
వడ్డించి
ముద్దుగణపతికి
ముద్దముద్దనూ...
ముదమారతినిపించి
మురిసిపోయాను.

అందరికీ వినాయక చవితి
శుభాకాంక్షలతో...శ్రీమణి

నే బ్రతికేసానోచ్...

ఉన్నట్టుండి ..చిమ్మచీకటి
కళ్ళముందంతా
నల్లని మబ్బు కమ్మేసినట్లు
రకరకాల రంగులు
నా కనుదోయి ముందర చిందరవందరగా...
అరఘడియలో నా మేను చల్లగా..దూదిపింజెలా తేలి
నేను  మెల్లగా అవనినొదలి అల్లంతదూరంలో...
అయోమయంగా...
అప్రయత్నంగానే
కనురెప్పలు కళ్ళను కప్పేశాయి...అప్పటికే
నాగుండె దడదడమంటూ రైలుబండిలావేగంపుంజుకుంది.
ఊపిరి ఉప్పెనలా ఎగిసిపడి
అలసి ఆగిపోయేలా వుంది.
పట్టువదలక ప్రయత్నిస్తూనే
వున్నా....ప్రాణం నిలుపుకోవాలని...
పదేపదే పెదవి కదుపుతున్నా
వదులై పోతుంది...ఈజన్మఅని,
ఎవ్వరికీ వినపడదే....
ఎన్ని మార్లు పిలిచానో...
పెదవి దాటనేలేదనుకుంటా...
పట్టించుకొన్న నాధుడే లేడు.
నా గుండె చప్పుడు స్పష్టంగా
వినబడుతుంది...
ఇక శలవా...మరి అన్నట్లు
ఎగిసిఎగిసి పడుతుంది...
ముగిసిపోతున్నట్లుంది..
మూణ్ణాళ్లముచ్చటగా...
నాజీవితం...
ముచ్చెమటలు పోస్తున్నాయి..
ముద్దెవరు చేస్తారు...మురిపెం
ఎవరందిస్తారు....నా ముద్దుల
చిన్నారులకు,
ఒప్పుకోలేక....ఓపికంతా
కూడదీసుకుని...ఒక్క నిమిషం
గట్టిగా... ప్రయత్నించా...
లాభంలేదు.....అయిపోయింది.అంతా...నిశ్శబ్ధం నేనెక్కడ...
ఉన్నానో...లేదో
ఊగిసలాడే....ఊహల
అలికిడికిమెలకువవచ్చిచూస్తే..
ఎదురుగా....ఆందోళనలో
నావాళ్ళందరూ....నాచుట్టూరా
నాకైతే...ఒక్కసారిగా
అరవాలనిపించింది...
*నే బ్రతికేసానోచ్...*
అవును....నేనుబ్రతికేవున్నాను
                *శ్రీమణి*