ఘంటశాల జయంతి సంధర్భంగా

ఓ సుమధుర గీతాల
సంగీత పాఠశాల
ఓ అమృత సుస్వరాల
కమ్మని వంటశాల
దివినుండి భువికి
ప్రభవించిన సరస్వతీ కళ
ప్రవహించె గాన గంధర్వుమయి
ఇల ఘంటశాల
ఆ మహా గాయకుని కని
పరవశించెనుకదా తెలుగునేల
ఆ అభిజ్ఞుని అభివర్ణించగ
నాకలాన కొచ్చిన భాగ్యమే కద
ఆ సంగీత సార్వభౌముని సన్నుతించగ
పదములున్నవా పృధివి పైనా
అయినా నాలుగు మాటలు
కవనంలా మీకు వినిపించే
ధైర్యం చేస్తున్నా ... 

సిరిమువ్వల సవ్వడిలో
చిరు జల్లుల సందడిలో
విరి తేనియ పుప్పొడిలో
మరు మల్లెల తాకిడిలో
పరువాల ఒరవడిలో
పల్లవించెను పాటై
మది మీటే మరువంపు తోటై
ఘన ఘంటశాల నోట

మధుర మధుర మకరందపు తేట
ఆణిముత్యాల మూట
మంచి గంధాల పూత
ఎల కోయిల పాట
అది చిగురాకు చిటపట
జిలిబిలి సొగసుల పోత
చిలికిన అమృత కలశమట
పల్లవించెను పాటై
మది మీటే మరువంపు తోటై
ఘన ఘంటశాల నోట

గాంధర్వమనిపించే
ఘనమైన గళమదియట
కమనీయ మదియట
ప్రభవించిన రవితేజమట 
పల్లవించిన పరమపదమట 
ప్రతిపదాన నడిచొచ్చిన
నవరాగమదియట 
నరనరాల ప్రవహించిన
తెలుగు రుధిర గరిమయట
పల్లవించెను పాటై
మదిమీటే మరువంపుతోటై
ఘన ఘంటశాలనోట

(శ్రీమాన్ ఘంటశాల గారి జయంతి సందర్భంగా....
చిరుకవన మందార సుమమాలికతో...
నివాళులర్పిస్తూ
ఆయన గగనసీమకు పయనమై దశాబ్దాలు దొర్లినా ఆయన మనకు ప్రసాదించిన సజీవ గానామృతాస్వాదనలో తరిస్తూ...

సాలిపల్లిమంగామణి(శ్రీమణి)