అన్న హృదయం హిమశిఖరం
చెల్లెలు సాక్షాత్తూ మమకారపు
మణిమకుటం
నా అనే బంధం
నేనున్నాననే
సంబంధం
తోడబుట్టిన అనుబంధం
అమ్మలోని సగం
నాన్నలోని మరో సగం
కలబోస్తే అన్నదమ్ముల అనురాగం
చెల్లి కంటిలో చిప్పిల్లిన
కన్నీటిచుక్క
నేరుగా అన్న హృదయాన్ని
చెమరిస్తుందంటే
సోదరి మోమున విరిసిన చిరునవ్వు
సహోదరుల జీవితాల్లో
కోటిదివ్వెలను వెలిగిస్తుందంటే
అదే కదా అద్వితీయ అనుబంధం
అన్నదమ్ముల శ్రేయస్సుకోసం
అహర్నిశలు ప్రార్ధించే ఆచేతులు
మమతల దారంతో కట్టే కంకణం
సురక్షాకవచమై
విరాజిల్లుతుందంటే
ఆడపడచుల సౌభాగ్యం కోసం
అన్నదమ్ములు కురిపించే
అనురాగం అర్ణవమై
వెన్నంటిన అదృష్టమై
ఆశీర్వదిస్తుందంటే
అది కదా రక్షాబంధనం
ఆ అపురూపమైన ఘట్టానికి
వేదికగా ఆనందాలవేడుకగా
అలరారుతున్న ఈదినం
అదికదా రక్షాబంధనం
ఎదురుగా ఉన్నా
ఏడు సంద్రాల ఆవల వున్నా
ఈచెల్లి హృదయం మాత్రం
నీ చుట్టూనే అన్నా...
నిరంతరం నీ క్షేమం కోరుకుంటూ...
నీ చెల్లి
అందరికీ రాఖీ పౌర్ణమి శుభాకాంక్షలతో
*సాలిపల్లి మంగామణి(శ్రీమణి)*
మరిన్ని కవితలకోసం వీక్షించండి
శ్రీమణి కవనసమీరంలో
https://youtu.be/oWFzVC4JPMo?si=3UuK4bEP90Jbv0W8
