మానవ జీవన ప్రస్థానం
జీవితం ఒక అష్టావధానం!
జీవన ప్రయాణంలో అడుగడుగునా ఎదురైన
అవరోధాలను అధిగమిస్తూ
సమర్థవంతంగా సాగిపోవడమే మనిషిగా మన కర్తవ్యం.
జీవితంలో తారసపడే ప్రతి సంఘటనా పృచ్ఛకుడై
సమస్యను సంధిస్తూ ఉంటే...
సమయానుకూలంగా స్పందిస్తూ,
సముచిత సమాధానాన్ని సమర్థవంతంగా
అశువుగా అందిస్తూ గమనం సాగించడమే మన కర్తవ్యం.
అప్పుడప్పుడు మనం నడిచే దారుల్లో
రాళ్ళూ ముళ్ళూ గుచ్చుకుని వేధిస్తూ ఉంటాయి.
అక్కడక్కడా పూల పరిమళాలు
మనలను సుతిమెత్తగా తాకి మైమరపిస్తూనూ ఉంటాయి!
కష్టాలైనా సుఖాలైనా, కలిమైనా లేమైనా...
ఏమైనా గాని అధిగమిస్తూ సాగిపోవడమే జీవనం
నిలదీసే అసంబద్ధాలూ ఉంటాయి,
కలవరపెట్టే అసందర్భాలూ ఉంటాయి...
సమయస్ఫూర్తితో, నైపుణ్యంతో దూసుకుపోవాలి!
జీవితమనే మహోత్కృష్టమైన పద్యాన్ని పూరించాలంటే...
రమ్యంగా మలచడానికి వర్ణనలూ ఉంటాయి,
చైతన్యం నింపడానికి చమక్కులూ ఉంటాయి.
నిషిద్ధాక్షరాలు నిలదీస్తూ ఉన్నా,
న్యస్తాక్షరాలు నాట్యమాడుతున్నా,
పొంతన లేని దత్తపదులూ దాడిచేస్తున్నా...
అనుభవాలను పొదివి పట్టుకొని
బదులిస్తూ సాగడమే మానవ జీవన ప్రస్థానం!
— సాలిపల్లి మంగామణి (శ్రీమణి), విశాఖపట్నం
నా మరిన్ని కవితలు నా గొంతులో విధానాలను కొంటే వీక్షించండి శ్రీమణి కవనసమీరంలో
👇👇👇👇👇👇👇
https://youtube.com/@srimanikavanasameeram?si=gsYiwS1d5nvQWKsz
కామెంట్లు లేవు:
కామెంట్ను పోస్ట్ చేయండి