అమ్మ

*అమ్మ*

అరుదగు  వాక్యం “అమ్మ”.
అత్యద్భుత కావ్యం “అమ్మ”
అమృతధారలు అధరాలకు
అందించే అమృతభాండం "అమ్మ"
అఖిలాండకోటి బ్రహ్మాండానికి
ఆది మూలం "అమ్మ"
ఆ విధాత మనకొసగిన
అమూల్య కానుక "అమ్మ"
అర్ధించకనే ఆకలితీర్చు
ఆరాధ్యదేవత "అమ్మ"
మాటలకందని
మమతలశిఖరం "అమ్మ"
ఊహలకందని
ఉర్వీ రూపం "అమ్మ"
శోకం తెలియని, లోకం ఎరుగని
ఆ పాపాయిని భువికి
పరిచయపరచిన పరమపావని "అమ్మ"
బుడిబుడి నడకల బుడతడి తడబడు అడుగుల నడకలు నేర్పిన
ఆది గురువు "అమ్మ"
కోటి ముద్దులతోడ, గోరుముద్దలుచేసి ఆ సుధాంశుని చూపి సుతునికి కథలు చెప్పే మహా కవయిత్రి "అమ్మ"
పారాడే పాపాయిని జాతిని కాపాడగ పోరాడే సిపాయిగా, మనిషిని మనీషిగా జగతికి వెలుగునిచ్చు దీపంలా మలిచే మహా శిల్పి "అమ్మ"
సృష్టిని నడిపించే రెండక్షరాలు "అమ్మ"
ఈజగతికి అమ్మకు సాటి "అమ్మే"
అమ్మని మరిపించే మరోపదం "అమ్మే"!

అనంత సృష్టికే
మాతృమూర్తులైన అమృతమూర్తులు
అయిన తోటి స్త్రీ మూర్తులందరికీ
పాదాభివందనాలతో...
మాతృ దినోత్సవ శుభాకాంక్షలతో...
(2013లో  నాచే విరచితమై చిగురాకులు అనే నా మొదటి కవితా సంపుటిలో ప్రచురితమైన *అమ్మ*  అనే ఈకవిత ఎంతోప్రాచుర్యం చెంది పలువురిప్రశంసలు పొందడంఆనందంగాఉంది.) *సాలిపల్లిమంగామణిశ్రీమణి*