సిద్ధమే

*సిద్ధమే*

గాయాలకు భయపడేది లేదు

రాగాలు నాలో రవళించి నను

మురళిగా మలుస్తాయంటే

ఉలిదెబ్బలకు సిద్ధమే

రమ్యమైన శిల్పమై విరాజిల్లుతానంటే

ఉప్పెనలోనూ ఊపిరోసుకుంటాను

ఉప్పొంగిన అలనేనై నేల తాకుతానంటే

అమావాస్య కంటికి కాటుకగా

కరిగిపోతాను..

రాబోయే వెన్నెలంతా నాపేరిట

రాసిస్తానంటే

నిస్సందేహంగా నిన్నలలో

కూరుకుపోతాను

రేపటి ఉదయంలా

రాణిస్తానంటే

ఓటమినై చరిత్రలో కలిసిపోతాను

రాబోయే యుద్ధంలో విజయఖడ్గంలా

మెరిసిపోతానంటే

ఘటనలన్నీ ఘడియలోపే

గతం కాగితంపై వాలిపోతున్నాయి

అనుభూతులు సైతం అరక్షణంలో

అనుభవాలై మిగిలిపోతున్నాయి

వెతలు చూసి బెదిరిపోతే

ఎదురుగా ఇక శూన్యమేగా..

ఎదురుదెబ్బలు గురువులనుకొని

ఎదురుకోనా నిబ్బరంగా

*సాలిపల్లి మంగామణి (శ్రీమణి)*