నా అందెల రవళి అలికిడిలోనూ చెలికాడా నీ పలుకుల సవ్వడి వింటున్నా
సాయం సందియ వెలుతురులో ప్రతి కదలికలో నీ నగుమోమే కనుగొన్నా
నిద్దురలోనూ ,మెలకువలోనూ ,నా కనుపాపలలో కదలాడి కలవరపరచి
వదలక నన్ను నిమిషము మాత్రమూ నీ తలపులు తరచి తరచి వెంటాడి
చల్లని పిల్లగాలి తాకినా మేను వేసవినే తలపిస్తుంటే తాళలేక
నీ అల్లరి ఊహల ఒరవడిలో అల్లంత దూరంలో ఉండిపోయా నాకు నేను
మనమల్లుకున్న ఆశల పొదరింట్లో నీ కోసమే నే నిరీక్షిస్తున్నా నువ్వొస్తావని
గొల్లున గోల చేస్తున్నాయి మరుమల్లికలు నా సరసన నువ్వు లేవని . వారిస్తున్నా వినకుండా
మన ఇరువురి ప్రణయం ఎరిగిన సెలయేరు గుచ్చి గుచ్చి అడుగుతుంది నీవెక్కడని
వేవేల పూబాలలు ఏకమయి ,ఏడనున్నాడంటూ నీ జాడనే అడిగాయి
వలపుల చెలికాడా ! నీ చెలినే మరచావా
అలిగిన వేళలో నా సొగసు చూడనెంచి
జాబిలి వంపున ఒదిగి దోబూచులాడేవా
నీవు ఆదమరచగలవా ప్రభూ నీ పాద మంజీర నాదాల సేద తీరే నీ రాధనేను
సాలిపల్లిమంగామణి @శ్రీమణి
కామెంట్‌లు లేవు:
కామెంట్‌ను పోస్ట్ చేయండి