శ్రీమణి గజల్

*శ్రీమణి గజల్*

మానవతా పరిమళాలు విరిసినపుడె మనిషితనం

మనసులోన మంచితనం నిలిచినపుడె మనిషితనం

మహర్షులూ మహనీయులు మనలాంటి మానవులే

విలువనెరిగి మసలుకొనగ తెలిసినపుడె మనిషితనం

ఆలోచన వరమొందిన

 ధన్యజీవి మానవుడు

అహమన్నది విడనాడీ

 గెలిచినపుడె మనిషితనం

దైవమంటె వేరుకాదు

 మనలోనే నివసించును

ఉన్నతమగు శిఖరముగా మెరిసినపుడె మనిషితనం

మానవాళి గమనంలో

 నడవడికే ప్రాధాన్యం

మణిమయమగు సుగుణరాశి ఒలికినపుడె మనిషితనం

*సాలిపల్లి మంగామణి ( శ్రీమణి)*