“అమ్మ”

“అమ్మ”

అరుదగు వాఖ్యం “అమ్మ”
అత్యద్భుత కావ్యం “అమ్మ”
అమృతధారలు అధరాలకు అందించే అమృతభాండం అమ్మ
అఖిలాండకోటి బ్రహ్మాండానికి ఆది మూలం అమ్మ

ఆ విధాత మనకొసగిన అమూల్య కానుక అమ్మ
అర్ధించకనే ఆకలితీర్చు ఆరాధ్యదేవత అమ్మ
మాటలకందని మమతల శిఖరం అమ్మ.
ఊహలకందని ఊర్వి రూపం అమ్మ.
శోకం తెలియని, లోకం ఎరుగని ఆ పాపాయిని
భువికి పరిచయపరచిన పరమపావని అమ్మ
బుడిబుడి నడకల బుడతడి తడబడు అడుగుల
నడకలు నేర్పిన ఆది గురువు అమ్మ.
కోటి ముద్దులతోడ, గోరుముద్దలు చేసి
ఆ సుధాంశుని చూపి సుతునికి
కథలు చెప్పే మహా కవయిత్రి అమ్మ.
పారాడే పాపాయిని
జాతిని కాపాడగ పోరాడే సిపాయిగా,
మనిషిని మనీషిగా జగతికి వెలుగునిచ్చు
దీపంలా మలిచే మహా శిల్పి అమ్మ.
సృష్టిని నడిపించే రెండక్షరాలు అమ్మ
ఈజగతిన "అమ్మకు సాటి అమ్మే"!
అమ్మని మరిపించే మరోపదం "అమ్మే"!


                                                                                                                                          శ్రీమణి