యుద్ధం

కత్తులుండవు కటారులుండవు

కుత్తుకలేవీ తెగిపడవు

యుద్ధభేరి మ్రోగదు

వింటినారి సాగదు

శత్రువు కంటికి కనబడడు

జరుగుతున్నది మాత్రం

భీకర సమరమే

అలనాటి మహాసంగ్రామంలా

గుర్రాలు ఏనుగులూ

రథాలూ సైనికసేనలు 

వుంటాయనుకొనేవు

అక్కడ ఆవరించింది

నరాలు చిట్లే ఉద్విగ్నత మాత్రమే

రక్తపుటేరులు ప్రవహించవు

అన్నీ కన్నీటి కాసారాలే

యుద్ధమంటే ఇరు వర్గాల

తలలూ తెగిపడితేనే గాదు

ఎదలోపల ఎడతెగని సంశోధనా యుద్ధమే

అంతస్తాపమే అంతర్యుద్ధమై

పోరు శంఖాన్ని పూరిస్తుంది

అప్పుడే అంతరంగం

కదనరంగమై కలవరపెడుతుంది

నిశితంగా పరికిస్తే ప్రతిఘటించే

ఆయుధాలన్నీ నిగూఢమైనది నీలోనే

ఒక్కోసారి మనోధౌర్భల్యమే మనుగడకు

అంతిమవాక్యం రాస్తుంటుంది

వేధించే అంతర్మధనం

ఛేదించలేని వ్యూహమే

సాధించాలంటే సమయజ్ఞతే సాధనం

*సాలిపల్లి మంగామణి(శ్రీమణి)*