గోదావరి ముద్దుబిడ్డ దర్శకులు దర్శకులు వంశీగారితో

తూరుపు గోదారమ్మ బిడ్డన్నేను

ఉత్తుంగ గంగా తరంగ
గోదారి గంగ సోయగం చూడంగ
రాజసమ్మొలికేటి రాజ మాహేంద్రము
కీర్తి అతిశయించంగ
పుత్తడి అక్షరాల లిఖియించినా...
సంపూర్ణమగునా నను గన్న గోదారి సౌందర్యమభివర్ణించంగ

అలలే మెరియంగ,
గలగలలే గగనానికి వినిపించంగ
చెంగు చెంగున దూకె
నిండు గోదారి గంగ.
నిత్య కల్యాణి సిరులు
మనకు గుమ్మరించంగా
ఆ సంభ్రమము కాంచంగ
మది  వేయి అక్షువుల కోరంగ

నింగి, నేలను కూడి నాట్యమాడంగా
నెలవంక విభ్రమయై
వీక్షించె విమల గోదారిగంగ
తల్లి గోదారమ్మ పాదాలు తాకంగ
ప్రణమిల్లుతూ పారాణి దిద్దగా

సూరీడు సుతారంగా
అంభరమే మురిసేను సంబరంగా
ముద్దాడ జూసేను
ముదిత గోదారిని సుతారంగా
కోటి పుణ్యాల ఫలమెమో
గోదారి నట్టింట నడయాడ
నా జన్మ సుకృతంబే గాద

కల్పతరువు, కామధేనువు కలగలిసిన గోదారి గంగ కొలిచిన వారికి కొంగు బంగారు తల్లిగా,
పిలిచిన వారికి నిత్య సౌభాగ్యమొసఁగంగ
అమ్మ గోదారి కౌగిట ఒదిగి పోవాలని
కొంగు పట్టుకు గారాలు ఒలక బోయాలని

చిలుక పలుకుల తోటి కవితలల్లాలని
చిన్ని ఆశ నాకు
తూరుపు గోదారమ్మ
నుదుటున తిలకమద్దాలని
చిన్ని ఆశ నాకు
తూరుపు గోదారమ్మ బిడ్డన్నేనంటూ
ధిగ్దిగంతాలకూ చాటి చెప్పాలని
చిన్ని ఆశ నాకు
ఏనాటికైనా తల్లి గుండెల్లోనే
కన్ను మూయాలని
చిన్ని ఆశ నాకు
గోదారి గంగమ్మ
అందియగా అమరిపోవాలని
                                              

గోదావరి అంటే వంశీ,
వంశీ అంటే అందరికీ గుర్తొచ్చే గోదావరి.
గోదావరి కీ వంశీ గారికిఉన్న అనుబంధం  తెలియని తెలుగువారుంటారా...
నా అత్యంత అభిమాన దర్శకులు వంశీ గారిని కలిసిన శుభతరుణం. కల నిజమయిన కమనీయ క్షణం..
ఆ అవకాశం కల్పించిన శ్రీ తాడిశెట్టి వెంకట్రావు మాజీ శాసన సభ్యులు,గుంటూరు వారికి కృతజ్ఞలు తెలుపుకొంటూ...

సాలిపల్లిమంగామణి@శ్రీమణి

https://pandoorucheruvugattu.blogspot.com