పేజీలు

బ్లాగు వీక్షకులకు నా హృదయపూర్వక నమస్కారములు

HTML codes

28, ఫిబ్రవరి 2014, శుక్రవారం

అరకు అలివేణి





ప్రకృతి పాదానికి  పచ్చని పారాణి 
మేటి సొగసుల రాణి  అరకు అలివేణి .... 
జలజల  పారే  జలపాత సరాగాల
గున్నమావి వంకలోంచి  ఆమని  రాగాల .... 
కొండల్లో ,కోనల్లో సెలయేటి సంతకాల . 
ధరణి  ధరించిన పసుపు జరీచీరలా ..... 
అరవిరిసిన వలిసెల   సొగసుల . 
అలరారే  మేటి సొగసుల రాణి , అరకు అలివేణి . 
వళ్ళు  జల్లుమన  పిల్లగాలుల ,
వన్నెల, చిన్నెల వంపుల దారుల 
గిరి  కన్నియల  చిరు ధరహాసాల 
మనసు మలిచిన  మధుర కవితలా .............
అలరారే  మేటి  సొగసుల రాణి ,అరకు అలివేణి . 
అరుణ  కాంతుల  తాకి   మంచు తుంపరలు  మంచిముత్యాల్లా ... 
ఎద  దోచే  పూదోటల  పరిమళాల 
బంతుల ,చామంతుల  తోడ  ఇంతుల  మంతనాల , 
ఝుమ్మని  పాడే  తుమ్మెద పాటలా ........ 
అలరారే  మేటి సొగసుల రాణి   అరకు  అలివేణి . 
     
ఇంతటి  సౌందర్యం  మా  సీమాంధ్రలో ఉన్నందుకు  
గర్వంతో  ఉప్పొంగిన హృదయంతో ...
                                                            
                                                           సాలిపల్లి మంగామణి  @ శ్రీమణి
                                                  

27, ఫిబ్రవరి 2014, గురువారం



 బ్లాగరు  సహోదరులందరికి  మహాశివరాత్రి  శుభాకాంక్షలు 
                               
                                             శ్రీమణి 

24, ఫిబ్రవరి 2014, సోమవారం

కలవరమాయే మదిలో


చిలుకమ్మ  అడిగింది  చిగురాకుని
చిరునవ్వు వెల  ఎంతని....  ?
భ్రమరమ్ము అడిగింది సుమ బాలని
తన నోరూర్చు  మధువేదని ... ?
చిరుకోయిల  అడిగింది  వాసంతాన్ని
తనను కరుణించగ  రావా ........అని .
కలువభామ  అడిగింది  చందమామని
తనను  చుంబించు ఘడియేదని ... ?
తరచి తరచి  అడిగింది పడతి  ప్రకృతిని
తనను  జత చేరు  వరుడేడని ......?
సహజమే కదా ... వరాన్వేషణలో
పరువంలో ప్రతి ప్రాణికి .......
కలవరమాయే  మదిలో ...
                                                       
                                                               శ్రీమణి
       

                  

23, ఫిబ్రవరి 2014, ఆదివారం

స్నేహ సౌగంధం







సృష్టిలోని బంధాలకే బహు అందం  స్నేహం . 
జత మనసులు  విరబూసిన  సౌగంధం స్నేహం . 
ఆప్యాయతానురాగాల  సిరి గంధం  స్నేహం . 
మధుర  సుమధుర మధురాతి  మధుర  మకరందం  స్నేహం . 
జన్మ జన్మాల  నిలిచేటి ఆనందం స్నేహం . 
వెల  కట్టగలేని  అమూల్య గ్రంధం  స్నేహం . 
మొగ్గ  విరిసి పుష్పమైన రీతి 
మనసు కలిసి స్నేహమౌను .... 
ఆ కుసుమం చిగురు కొమ్మన  మెరిసినటుల 
మన స్నేహం   జీవిత చరమాంకం   వరకు  నిలవాలి ... 
ఆ సుమం  పలువురికీ పరిమళాలు పంచినటుల 
మన  స్నేహం  అందరికీ  ఆదర్శం  కావాలి ..... 
కానీ ,
ఆ  పూవు  వాడిపోయినా , రూపు మారిపోయినా 
మన స్నేహం  మాత్రం  చిరకాలం చిగురించాలి ...... 
ఈ స్నేహ సుమం  వాడని  కుసుమం 
అని  మరచి పోకు  నేస్తమా ...... 
నను విడిచిపోకు  మిత్రమా .... 
                                                           శ్రీమణి 


22, ఫిబ్రవరి 2014, శనివారం

నా చిన్ని హృదయమా ....



ఓ  చిన్ని  హృదయమా ..... !
నా.... చిన్ని హృదయమా .......... 


నీకెన్ని  ఊహలే .... 
ఎన్నెన్ని  ఊసులే 
ఎంతటి  నెరజాణవే 
ఎంతెంత  మాయలాడివే ...
మైమరపున  జాబిలితో  విహరిస్తావు 
నీలి మబ్బునీడలపై నిదురిస్తావు 
ఆకసాన హరివిల్లు పై  అలిగి  కూర్చుంటావు 
తారల  నడుమన  చేరి  తళుకును   నేనంటావు 
ఆదమరచి  నే  నిదరోతుంటే మధుర  స్వప్నమై యెదురొస్తావు 
నా కనులు గప్పి విహంగమై  విహరిస్తావు 
మందలించి  నా మాట వినమంటే బుంగమూతి  పెడతావు 
నీ కోసం  నేనా  నా  కోసం  నీవా అన్నప్పుడు 
నిజానికి  నువ్వే  నను  నడిపించేది  
నువ్వే నను శాసించేది 
గుప్పెడంత  నా  హృదయమా  
నీ  చప్పుడు  ఆగిన  మరు నిమిషం 
నా ఉనికే  శూన్యం 
అందులకే  చెబుతున్నా  నా మనసా నీకభివందనం

                                                        శ్రీమణి 

20, ఫిబ్రవరి 2014, గురువారం

సౌందర్య పరవశం




తెలతెల్లగ తెల్లారగ  ఉలిక్కిపడి లేచింది .  
తారల పందిరిలో  శయనించిన  కన్నెభామ . 
ఎందైన, ఎందైనా ,ఎందెందైన  నాకు సాటి ఎవరన్నది ?
నాకు దీటు  రారన్నది ..... 
తన సౌందర్య  పరవశాన  తానె ముగ్దురాలైనది . 
పంచాభూతాలపై  నాట్యమాడుతానన్నది ..... 
సింధూరపు  భానుడనే నా నుదుటన తిలకం  దిద్దెద . 
వెండి మబ్బునే  నా నడుముకు  చీరగ చుట్టెద . 
నెలవంకనె  అలవోకగ నా మెడలో ఆభరణం  చేసేస్తా ..... 
గంగా ,యమునా , కృష్ణా ,పెన్నా ........... 
నదులేవైనా , సెలయేర్లైనా 
అన్నీ  నా  చెలరేగిన  కురులే కదా ....... 
సప్తసంద్రాలన్నా ,లక్షద్వీపాలైనా 
కొండలైనా,కోనలైనా ...... కోయిలమ్మ కూతలైనా 
అన్నీ , నా అందానికి  తీరుగ  దిద్దిన  తుది మెరుగులు కావా .........
అని  చిరునగవును చిలుకరించె పులకరిస్తూ ..........  
పడచుమనసు .... 
                                                            శ్రీమణి 

18, ఫిబ్రవరి 2014, మంగళవారం

నేనెవరో తెలుసా ..... ...... ?



నేనెవరో   చెప్పుకోండి ?

పచ్చని  ప్రకృతి ఒడిలో 
పచ్చికపై  జాలువారు  కిరణం నేను .... 
పున్నమి రాతిరిలో  మనసును మైమరపించే 
వెండి వెలుగు జిలుగును  నేను ...... 
విరిసీ విరియని  రోజా రేకున 
ఊగిసలాడిన  హిమబిందును నేను ...... 
సంకురాతిరి సందె  వెలుగులో 
పడతి  వాకిట  తీర్చిదిద్దిన రంగవల్లిని నేను ....... 
పురి విప్పిన మయూరానికి  వయ్యారాల  నాట్యం నేర్పిన 
అచ్చర నర్తకి అచ్చంగా  నేనే ..................... 
ఆకాశంలో ఆ సప్త వర్ణాల హరివిల్లు నేనే ...... 
కొండాకోనల్లో తుళ్లిపడ్తూ  ఉరకలు వేసే సెలయేరునూ  నేనే ... 
అంతెందుకు . ప్రకృతి ప్రతి అందానికి  ప్రతిరూపం  నిజంగా నేనే .. 
విరజాజి నేను,  విచ్చిన   చామంతి  నేను,
ఎగిసే అలను , కురిసే జడిని ,, ప్రకృతి  ప్రతి  ఆకృతిని  నేనే ... 
సాక్షాత్తూ  ప్రతి పడచు హృదయంలో కదలాడే ఊహను నేను  

16, ఫిబ్రవరి 2014, ఆదివారం

ప్రజాస్వామ్య ఫలాలు



ప్రపంచాన సాటి లేని ప్రజాస్వామ్య దేశమంటూ 
పొగుడుతారు భారతాన్ని . విశ్వమంతా ...
అది పరిపూర్ణ ప్రజాస్వామ్యమనుటలో ... వాస్తవమెంత ?
దాస్యశృంఖలాలు తెంచుకోని ,
మహామహుల త్యాగంతో తెచ్చుకొన్నాం స్వాతంత్ర్యం .
రాజు లేని రాజ్యంగా ప్రకటించాం గణతంత్రం ...
ఆంగ్లేయుల పాలనల మాకొద్దని ,
మా రాజ్యానికి మేమే రారాజులమన్నాం .
ప్రజాస్వామ్యం సాధించామని ప్రగల్భాలు పలికాం 
నేటి ప్రజాస్వామ్య వ్యవస్థలో పడరాని పాట్లు పడ్తున్నాం.
తెల్లదొరల పాలనలో బానిస బ్రతుకైనా బ్రతికాం .
నేటు ప్రజాస్వామ్య రాజ్యంలో బ్రతుకే బరువాయెకదా ..
అడుగడుగున స్వార్ధం తో అల్లాడుతున్న వ్యవస్థ .
అవినీతి రాజ్యమేలుతోంది నేటి మన ప్రజాస్వామ్య వ్యవస్థని .
నోట్ల వ్యామోహంలో ఓట్లనమ్ముకొంటున్నాం .
మద్యంమత్తుల్లో నాయకులనెన్నుకొంటున్నాం .
చేతులారా మన తలకి మనమే కొరివి పెట్టుకొంటున్నాం .
దొరికినంత దోచుకొని దొర అవుతాడొక్కడు
తినడానికి తిండి లేక భిక్షమెత్తుతాడొకడు .
ఇదీ నేటి మన ప్రజాస్వామ్య సమానత్వ నమూనా :
ఆకలి చావులు చీకటితావులు ,
రైతులవెతలు ,అబలల కన్నీటి కతలు ,
నేటిస్వాంతంత్ర్య పంట ఫలాలు .
పదవులకై పోరాటం ,ఆధిపత్యానికై ఆరాటం ,
నీతిమాలిన రాజకీయం ,
ఇదీ నేడు ప్రజాస్వామ్య భారతీయం ... 
అయినాకాని ...
ఆసన్నమాయెను అనువైన సమయం :
నీ ఓటు అనే మహాయుధం పూని ,
సమర్ధ నాయకుని ఎన్నుకోని ,
నీకున్న ప్రజాస్వామ్య ఫలాలను అందిపుచ్చుకొని ,
ప్రక్షాళన చేసేద్దాం పాతుకుపోయిన పాపాన్ని .
విమోచన కల్పిద్దాం బ్రష్టు పట్టిన జాతికి ...
కూకటి వేళ్ళతో పెకలిద్దాం అవినీతి కలుపు మొక్కల్ని .
చేయి చేయి కలుపుదాం ప్రజాస్వామ్యం పరువు నిలబెడదాం ......

                                                                                                                                                                                                        శ్రీమణి 

యువత-దిశానిర్దేశం




కదలిరా యువతా మనం కలలుగన్న ప్రపంచానికి
అవనిపై అదృష్టవశాత్తూ లభించిన
ఈ మానవ జన్మకు అర్ధం పరమార్ధం కల్పించడానికి
ప్రతి జీవికి జననం మరణం తధ్యం కానీ,
నడుమ నీవు సాధించే ఘనతే కదా సత్యం
ఓ యువతా నీ బంగరు భవితకు ఆధారమే నీ నడత.
నేనెంత నేనెంత ఈ అనంత మానవాళి జీవితాలు మార్చుటకై,
కష్టాలు కడతేర్చుటకై అనుకోకు
నేనే అంతా, నాదే ఈ విశ్వమంతా అనుకుంటే
మార్చలేనిదేదీ ఈ జగాన?
కటిక చీకటిలొ చిరుదివ్వెలా ప్రకాశాన్ని అంధించు.
కలుషిత వ్యవష్థపై నీ యువశక్తి బాణాన్ని సంధించు
రేగింగులు, ఈవు టీజింగులు మాని
చేజింగులు చెయ్ నీ లక్ష్య సాధనకై
అమ్మా నాన్నల ఆశలు ఆవిరి చేయొద్దు,.
అమవాస్య చీకటికి చేరువ కావద్దు
కారు చీకట్లు ముసురుకొన్నా, కరవుకాలం ముంచేస్తున్నా
అవినీతి రక్కసి కోరల్లో చిక్కుకు పోవద్దు
దోపిడి, దొంగతనం నీకేలా?
దొర మార్గాలుండగ, నువు పయనించేందుకు!
పొరుగు దేశాలకై పరుగులేల? అగ్ర రాజ్యాలకై వలసలేల?
నిను మోసిన నీ కన్న తల్లికి, జన్మభూమికి వన్నె తేవలెరా,
భరతదేశపు కీర్తి దిగ్దిగంతాలలో మారుమ్రోగేలా
నిరుద్యోగం నిరుద్యోగం అని చింతించకు,
అందిపుచ్చుకో మనకున్న అపార వనరులు నీ చెంతకు
సద్వినియోగం చెయ్ క్రొత్త పుంతలు తొక్కుతున్న సాంకేతిక పరిజ్ఞానాన్ని.

ఇనుమడింపచెయ్ నీ దేశ ప్రగతిని
గమ్మత్తులు చూడాలని మత్తుల్లొ తూలేవో,
మరమ్మత్తు చేయలేని మరబొమ్మై మిగులుతావు
ప్రతిదినం ఎదో ఒకచోట అత్యాచారం
ఇది ప్రస్తుత మన వ్యవస్థ గ్రహచారం
మానవత్వం పరిమళించగ మార్పు రావాలి ప్రతి మనిషి నుండీ,

రూపుమాపేందుకు ఈ దురాచారం
పాశ్చాత్య పోకడలు మనకేల,
జగద్విఖ్యాతి చెందిన సంస్కృతి సాంప్రదాయ రీతులు మనకుండగా
జాతి వర్ణ కుల వివక్షతలనే జాడ్యాలు మాని
ఐకమత్యమెనే అస్త్రాన్ని పూని
యువాతా నీవు దూసుకుపో సమసమాజ నిర్మాణం వైపు
కళకళ లాడే భరతావనిలో కల్పతరువై వర్ధిల్లు.
కలనైనా కలుపుమొక్కవు కావద్దు
ఓ యువతా, రేపటి ఉషోదయాన ఉదయించే భానుడివై రా,
అవినీతి, అక్రమాల అణచివేయు రుద్రుడివై రా
సభ్య సమాజనికి ఆదర్శం నీవై జాతిని జాగృతం చెయ్,
ప్రగతివైపు అడుగు వెయ్ జాతి రత్నమై


                                                                                                  శ్రీమణి 

14, ఫిబ్రవరి 2014, శుక్రవారం

ప్రేమా చిరునామా




ఎల్లలు  దాటిన  అనురాగానికి  చిరునామా 
కల్లలెరుగని అనుబందానికి  నిర్వచనం  ప్రేమ 
ఆకాశంలా  హద్దుల్లేనిది 
మాట  మూగబోయినా ... 
మనసు గలగల  ఊసులాడే మౌన భాష  ప్రేమ . 
కనులు లేకపోయినా  
ఎద  లోపల  కదలాడే మధురానుభూతి  ప్రేమ . 
జత మనసులకూపిరి పోసే 
అమృత జలధార  ప్రేమ 
కటిక చీకటి పైన కూడా  వెలుగురేఖలు 
కుమ్మరించే  నవకాంతి కిరణం  ప్రేమ 
కనురెప్పలు  దారి తెరచి 
ఎద లోపలి గుడి  తెరచి  
తను కోరుకున్న  ప్రతిరూపం  
పదిలం  చేసే  అపురూపమైన దర్పణమే  ప్రేమ 
సమస్త సృష్టి  స్థితి లయకు  ఆధారం ప్రేమ 
ఇరు హృదయాల  ఆకర్షణ  కాదు ప్రేమ  
ఆరాధన  ప్రేమ, ప్రేమతో  ప్రేమించు, ప్రేమకై జీవించు 
జీవితాంతం ప్రేమగా జీవించు 
ప్రేమకై ప్రేమతోనే  ప్రేమగా ప్రేమించు 
నమ్మకం, విశ్వాసమనే  మూలస్తంభాలేసి 
మూడు ముళ్లు  ఏడుఅడుగులు ప్రమాణాల  మనువే పరమావధిగా 
మనసులు ముడి వేసుకొనే ముచ్చటైన  ప్రేమకు  పరమావధి

ప్రేమికుల రోజు శుభాకాంక్షలు
      
                                                                           శ్రీమణి

10, ఫిబ్రవరి 2014, సోమవారం

నీకై నేను ...

   
     

నీకోసమే  నే  వేచియున్నా... 
ప్రతి  కదలికలో  నిన్నే చూస్తున్నా  
ఆ జాబిలి  నీవైతే ... 
కలువను  నేనవుతా 
ఆ మధుపం  నీవైతే ... 
మధూలికను  నేనవుతా 
నీలాకాశం నీవైతే ... 
హరివిల్లును  నేనవుతా 
ఆ  మనసిజుడివి  నీవైతే ...
నీ మనసెరిగిన   సతి నేనవుతా 
కన్నులు నీవైతే ... భాష్పం నేనవుతా 
మెరిసే మేఘం నీవైతే ... 
పురి  విప్పిన  మయూరి నేనవుతా 
చిరుమావివి నీవైతే ... 
చిరు కోయిల  నేనవుతా 
ఆ  మాధవుడవు నీవైతే ... 
నీ రాధను  నేనవుతా .... 
                                                                                శ్రీమణి 



9, ఫిబ్రవరి 2014, ఆదివారం

ఎందుకెన్నుకోవాలి నాయకులను ?



ఎందుకెన్నుకోవాలి  నాయకులను ?
ఎందుకు తన్నుకు చావాలి  నాయకులకై 
ఎంతమంది  ప్రజాపరిపాలకులు 
ప్రజలకై  పాలన  చేస్తున్నారిపుడు 
ఎన్నికలొస్తాయని  ఎన్ని''కలలో '' సగటు ప్రజకు 
తమనుద్దరించగ  సమర్ధ నాయకుడొస్తాడని 
''ఎన్నికలలో '' సగటు ప్రజకు 
నిజానికి  ఇది ఎండమావుల తావులకై  పరుగులిడిన  వైనం 
కొందరి ప్రజానాయకులకు  ప్రజలేగా ''ఇంధనం ''
ఎంత  దోచినా తనివి  తీరని '' ప్రజాధనం ''
అదే వారికి ''మూలధనం ''
నేటి కొందరు  అవినీతి రాజకీయ శక్తులు 
అడుగడుగున  కుట్రా కుయుక్తులు 
కులాల పేరిట, మతాల పేరిట, ప్రాంతాల పేరిట 
మనుష్యుల  విడదీసి, నోట్లను  ఎర చూపి 
కోట్లాదికోట్ల  ఓట్లను  నోట్ల కట్లతో  కట్టిపడేసి 
కర్తవ్యం  మరచిన  కాఠిన్యమూర్తులు 
నల్లదనం  కరిచిన కక్కుర్తి  రాబంధులు 
''ఎందుకెన్నుకోవాలి  నాయకులను 
ఎందుకు తన్నుకు చావాలి  నాయకులకై ''
ప్రజల వెన్నెముకపై  మోయలేని  పన్నులభారం 
అందలానికెక్కిన  అవసరాల ధరలు 
అరకొర వైద్యాలు, అందరాని విద్యలతో 
అల్లాడుతున్న  ప్రజానీకం పాట్లను 
పట్టించుకోని  పాలకవర్గాలు 
మరి... ''ఎందుకెన్నుకోవాలి  నాయకులను 
ఎందుకు  తన్నుకు  చావాలి  నాయకులకై ''?

                                                                                           శ్రీమణి 

8, ఫిబ్రవరి 2014, శనివారం

చిత్తం గీసిన చిత్తరువు



నా  గుండె  గొంతుక నే  సరిగమ రాగం చేసి, 
నా  అందెల  సవ్వడినే  నవశ్రుతి  చేసి,
నా గాజుల  గలగలనే  స్వరముగ  చేర్చి,
నే  పాడెద  నవ్య భవ్య  మాధుర్య గీతం ... 
నా  ఊహలే  రంగుగా ,నా ఊపిరే  కుంచెగా,
నే గీసెద  నా హృదయపు  కాన్వాసు  మీద 
రసరమ్య మనోహర  రమణీయ  చిత్రం
అలరించే  అనుభూతులు  అల్లిక చేస్తూ,
అనుభవాల  అక్షరాలు  ప్రతిబింబిస్తూ,
సమాజాన  ప్రజ్వలించు పాపాలను  తూర్పారపోస్తూ,
నే రాసెద  సుతిమెత్తని  తియతీయని  చిరుకవితల్లా 
                                                         
                                                                                           శ్రీమణి 

5, ఫిబ్రవరి 2014, బుధవారం

ప్రతిఫలము



ఏమిస్తే ఆ సూర్యుడు 
నవ ఉషస్సులను  ఉదయిస్తున్నాడు 
ఏమిస్తే ఆ చంద్రుడు 
సిరివెన్నెల  కురిపిస్తున్నాడు 
ఏమిస్తే  ఆ పూవులు  
విరబూసి  పరిమళాలు వెదజల్లుతున్నాయి 
ఏమిస్తే ఆ ఫలాలు  
ఫలియించి  ఆకలి  తీరుస్తున్నాయి 
ఏమిస్తే  ఆ మబ్బులు  
వానలు కురిపిస్తున్నాయి 
ఏమిస్తే ఆ తరువులు  
వింధ్యామరలై  వీస్తున్నాయి 
ఏమిస్తే ఆ కోయిల  
మధురగానం  ఆలపిస్తుంది 
ప్రతిఫల మాశించక  ప్రకృతి  ఇచ్చే 
ప్రతీ ఫలం  అనుభవించు  
మానవుడికెందులకు  
ప్రతీ పనిలో " ప్రతిఫలం
                                                                            
                                                                                    శ్రీమణి 

4, ఫిబ్రవరి 2014, మంగళవారం

ఓం శ్రీ సరస్వత్యైనమః

                                                         
 నేడు  శ్రీపంచమి సరస్వతీ పూజకోసం నా ఈ చిన్ని కవితాకుసుమం     
జననీ జ్ఞానప్రదాయిని  శ్రీవాణీ
విద్యున్మాలిని  వీణాపాణీ  శర్వాణీ
సౌదామినీ  శాస్త్రరూపిణీ  సువాసినీ
నా మనసునె హారతి  చేసేద  
గైకొనుమమ్మా కళావాహినీ
అర్చింతును  తల్లీ  
నిను అక్షరమాలికలతోడ
నిను కొలిచెద దేవీ నిరతం 
నిర్మల హృదయమ్ము తోడ
ప్రణమిల్లెద పద్మలోచనీ 
నీ పాదాల చెంత కవితాకుసుమాలతో
అనుగ్రహించు సరస్వతీ  
నీ సాహిత్యాంబుదిలో నీటి బొట్టై  నిలిచేందుకు
ఆశీస్సులందిచవమ్మ  వాగ్దేవీ  
నా మదిలో నీ ధ్యానమే  స్మరించేందుకు
ప్రసరింపుము  శారదాంభ  
నీ కృపాకరుణా కటాక్ష వీక్షణాలు  
నా ఈ చిరు కవితార్చనపై
                                                                                                                                                                                                                           
                                                                                                                                         శ్రీమణి

                                                            

3, ఫిబ్రవరి 2014, సోమవారం

తెలుగుతల్లి ఆక్రందన


తెలుగుతల్లి గుండెల్లో పగుళ్ళు  పుట్టాయి 
పచ్చని తెలుగు పైరులో తెగుళ్లు పుట్టాయి .... 
మా తెలుగుతల్లి సరములోని  
సుమాలు విడివడిపోయాయి 
అన్నదమ్ముల  ప్రాంతీయతగాదాలు 
అమ్మ పంపకాలకి పాల్పడ్డాయి 
కళకళలాడే తెలుగునేల కలిసుండే 
కలలు కల్లలైపోయినాయి 
తలో దిక్కైన తనపిల్లలతో తల్లడిల్లే  తల్లిమనసు 
సమైఖ్య గీతంలో పల్లవి పలు దారుల మళ్ళింది 
కళ్ళెదుటే కన్నతల్లి 
కన్నీటి వెల్లువై  ఉప్పొంగింది 
సమరం సంబరమయ్యిందని సంరంభం ఒక వైపు 
అమరజీవుల త్యాగఫలం  విఫలమాయెనని  
విషణ వదనాలొకవైపు 
ఒక ప్రక్కన మోదంతో ఒక ప్రక్కన ఖేదంతో 
అటు వీపు ఇటు కడుపని 
మిన్నకుండి  చూస్తుంది 
ముక్కలైన తెలుగుతల్లి 
                                                                                              
                                                                                    శ్రీమణి 

2, ఫిబ్రవరి 2014, ఆదివారం

బిత్తరపో యిన ఉత్తరఖండం



మహోగ్రరూపం  మహోగ్రరూపం 
మహాప్రతాపం మహాప్రతాపం 
మంచుకొండల్లో మహాగంగమ్మ ప్రళయ తాండవం 
మరు భూమిని తలపిస్తూ  ప్రకృతి మ్రోగించిన మరణమృదంగం .... 
ఉత్తరఖండం బిత్తరపోయిన తరుణం 
బ్రద్దలయిందా ఆకాశం ... 
అగాధంలో కూరుకు పోయిందా చారధామం 
చారధామ యాత్ర మారిందా..  మరణయాత్రలా 
ఎల్లలు దాటిన కల్లోలం ... కళ్లెదుటే కైలాసం 
అసువులు బాసెను అమాయకజనం 
తల్లి బిడ్డ జాడ కానక తల్లడిల్లే తలోదిక్కై 
కొండపెళ్లలు  ఫెళ్ళు ఫెళ్ళు మన ప్రాణమరచేత పట్టుకొని 
కళ్ళనీళ్లె  కడుపు నింపే ,కటిక చీకటి పహారా ... కాలయముడే  కాపలా .. 
మృత్యు కౌగిట మూగ అభ్యర్ధనల 
ఆర్తనాదాలు , ఆకలిచావులు ,హాహాకారాలు 
గ్రుక్కెడు నీళ్లు లేక బిక్కుబిక్కుమనె  దిక్కుమాలిన చావులు 
పెను విధ్వంసం పెను విధ్వంసం దేవదేవుని దివ్యధామం 
హృదయ విదారకంగా ఆలపించే మృత్యుగీతం 
పరమశివుడే ప్రత్యక్ష సాక్షిభూతం ... 
స్వయం కృతపరాధం , స్వయం కృతపరాధం, 
మానవతప్పిదాన ప్రకృతిపై మానవ వికృత చర్యకు  పర్యవసానం ... 
పరమవిలయ తాండవం ... 
                                                                                                                                                                                                       శ్రీమణి 

1, ఫిబ్రవరి 2014, శనివారం

పరితపిస్తోన్న వృక్షజాతి



తరువులు  తల్లడిల్లె 
తమ ఉనికి మాయమౌతుందని
మానవులకు  తాముచేసిన  
అన్యాయమేమనుచు 
మానవాళికి   ఆయువిచ్చు 
తమ ప్రాణం తీయుదురాయని 
నీడనిచ్చు మా జాతిని 
నిర్దయగా కూల్చివేయుదురాయని 
మీ పాపానికి తారెత్తిన భూతాపం 
చల్లార్చిన మాపైనా  మీ ప్రతాపం 
మిము కబళించే కాలుష్యం కరిగిస్తూ 
అలసిన మీకు చల్లని గాలుల సేద తీర్చుతూ 
అమృత ఫలాల తో ఆకలి తీర్చుతూ 
మా తనువున అణువణువును మానవాళికర్పించే  
మా పైనా  మీ అమానుషత్వం 
జాలిలేని మానవుడా మా జోలికి రావొద్దని ,
మా  ప్రాణం  తీయొద్దని విలపిస్తూ  
వేడుకొనెను విరిగిన కొమ్మల తోడ 
అపకారికి ఉపకారం  మహాత్వమన్నారే 
మీ జాతికి మహోపకారం  చేసిన 
మా కిదేనా  మీ ప్రత్యుపకారము 
మము ఉద్దరించగ ఉద్యమించండి  
నవ ఆశోకులయి  నడుం బిగించండి 
పుడమి తల్లి  పులకరించగ  ప్రకృతిమాత    
పరవశించగ కరువు  రూపు మాపగా 
పర్యావరణం పరిమళించగా  
భావితరంలో  పచ్చని  పసిడి నింపగా 
పచ్చని మొక్కని నాటి పెంచుదాం  
వృక్షజాతి ఋణం  తీర్చుదాం 
                                                                                                                            శ్రీమణి